Vikingane trudde på eit liv etter døden
Krigarar som døydde i kamp reiste til Valhall, krigsguden Odins store hall. Der skulle dei trene til den siste kampen − Ragnarok. Folk som døydde av sjukdom kom til Helheim i underverda. Dette kan vi lese om i myter og sagaer.
Reisa til dødsriket
Uansett var det viktig å førebu reisa godt. Det var nok derfor kvinnene frå Oseberg blei gravlagde i det store skipet. Skipet skulle føre dei til dødsriket. Det var også viktig å ta med seg dei tinga ein trong i den neste verda. Dess mektigare folk var, dess rikare var gravgåvene dei fekk med seg.
Det var viktig å vise seg fram
Sjølve gravlegginga var også viktig. Tenk deg eit stort opptog med hestar, vogn og sledar. Kanskje kom folk frå nær og fjern for å delta i den storslagne seremonien?
Her er ei fargelagd teikning laga etter biletvevrestar som blei funne i Oseberggrava. Dei som har laga teppet har nok overdrive litt, men opptoget på veg til gravlegginga ved Oseberg kan ha likna på dette. Foto: Kulturhistorisk museum, UiO/ Teikning: Sofie Krafft.