Karbi Anglong pu ke Karbi atum a inglong pu aphan lo.A longle kangtui ke 40 metres pen 1363 metres an doji. Ladak a botor ke sub-tropical rainforest. Kaziranga National Park e-phar ke Karbi Anglong Arlo si kedo.
Karbi Anglong A Havar ke chari-chalon ke Assam arlo kedo Karbi Anglong Autonomous Council (KAAC) pen si chari pon bom.
Karbi Akhai Aphai. Karbi Anglong lapen adung-arai a havar along kedo phai 800,000 nak doji. Labangso aphai abang ke akaprek-kaprek Karbi asong atum si kapangdak. 2011 ahut kepadopon a population census ateng ke Karbi Anglong lapen West Karbi Anglong hini pangrum pet pen, munit kedo aphai 956,313 do.
Karbi atum ka-ningje alam ke Tibeto-Burman pu asan chom arlo is kedo dun. Hako penta karbi atum ke amethang aphan ke Arleng pu si kachi-pu. Karbi akhai ta kedo barim akhai apor si konat pensi nang keplang cheng adim abang ke ki-ri dam sung krung lo. Hako ahut Central Asia pen si Assam an kevang ta-hai. Karbi nang keplang a lun-tomo ta do oh, Kolong lapen Kopili aroi ari-ri Langlu(tiwa) lapen Borahi a khai atum pen Kaziranga anat ke do rap alam ta chethan.Hako ahut ke Karbi recho pen si khai ke-chari pon. Pinpomar amai along si Lindok aphan ingvai pon ji; Habe, Katharpo, Dili atum si rat chari along cherap dunpo. Non ke labangso a ke chari ke hako ason kali det lo. Do voi phit sita ajakong abang k ave det lo.
Karbi akhai along kur pho do. Kur isi angbong che-en che-do kartang.
Ake-ong dung a Karbi arat ke sai ka tiki si ke-ong. Sai katiki pen si menang an atum ke chepangreng bom. Akiki a sai kachoklem athai ke nang ke klang ajir ding de lang.
So-Arlo Lapen So-Pinso Arpu
Karbi akhai along ke so-pinso arat si hako pen ta ka chepahai, kachepangri tang et aphi lo-te arloso abang ke a penan ahem si chidun nang jui ti-ti. Akur abang ke chelar le.
Hem arlo choklem-chodam a-sai do an ke so Arlo atum si hako ahut penta adeng lo. Aan-han kitun, hem along osomar kelana,karkok-karphek, therang kethak hai-hui a-sai lapen ke kithi-kejang ahut kacharhe ke so-arlo atum kai ke penta klem pon bom. Charhepi atum si chomangkann akut karjong apan chom arong an kepaleji aphan keja dun atum lo.
Hong keklem nang ji a-sai ke so pinso atum adeng lo. Sikar kedam, cho-kalkli cho-phejo, jakong a-sai, hai-hui ke so pinso atum si kaike penta klem pon bom lo.
Sai kachotiki along abang ke pinso pen arloso atum ta klem rappet .
Hem along ke so-arlo lapen so-pinso ta a sai cheklem rep lapen maan-peng ta kehok plak-ple. Penanso kachebohong along ta hem asor inut aphan si raap dun chot pu ajat ke kali. So-arlo aphan kelangrem pu abang ke khai arat ta che chak che. Lasi non akai along ta so-arlo pen so-pinso ke klem a-sai cheplak o-eh.
Kachoro pon
Ladak ketok pangrum pon alam do aan ta Karbi atum pen si pangrum pon lo, Karbi atum ke lun tomo pen si phurkimo chethan chemum labangso ajoine alun tomo abang masap keprek dokok ta thek athe ketok abang ke non si kecheng dun lang.
Ladak hormu kapangrum along hormu nang semar pi dun atum do an aphanta kurvangthu pajir lo . Amen abang ke ahormu along si ketok dun do.
Karbi Jutang Asong (KCS) lapen Karbi so a arlo asong atum aphan ta 1993-1994 aningkan neli phan hormu nang ka pangrum pi dun thek apot choro par pik lo
Aningkan-ningkan penta neli phan Karbi a phurkimo lapen lun tomo nang than abang do o lo bontsita abangphu tin amen k tok dun lap le det lo lasi Karbi akachinghon karbi akhai aphan choro pik lo.
Libon Kropi, Chomang Kro, Rekha Rongpipi, Michael Timung atum neliphan kai ke ta nang kerap dun apot kurvangthu pajir lo. Neliphan therang keran, therang kethak lapen akaprek-kaprek atomo apor nang chipi pen nang kethan apot choro par lo. Lapen charhepi Kanam Beypi, Chemar Rongpipi lapen Rengka Ingtipi atum aphan ta choro lo. Lunsepo Hundorsing Bey lapen Lunsepi Moina Phurapi atum aphan ta choro ik lo.
Prof. Desmond L Kharmawphlang, NEHU aphanta ajahak a hormu aputhak nang ke than pachini aphan kurvangthu pajir ik lo.