Peh kethak lapen pinden-sumpot
So Arlo atum k bihek angko pen ta apai, aphi, ate atum aphan peh kethak kethek dunlong lok pen ta charli thek dun o. Peh kethak thek a nimso pi ke a hem asor aphan peh ri pador plup ta un lo. Kethak thek atum ke peh akeme ta en long lo. Aprang ahut ke anutin ta peh thak thek rep sita non ke tok-bor kecharli abang chihung munak amat peh kethak abang ke pang kre ve.
Hem along kejeng ahon
Rong alom ke non pu ta phelo la pen honki ahon ke hem along ari pen si kejeng lang. Bonsita kejeng aphai abang jum hek lo,athe hithi arong synthetic ahon ke-en si chihung munak lo. Ingki pangreng po ingki-an, Sangkrung lapen hanjor si pi po. Avosok ahut si ahon abang hek si oop po hon jeng ik po. Ingki a vosok kecho aning kehang atum ta do. Northeast, India arlo honki ke-en abang do o. Honki ahon ke ingduk o lapen ar-om o. Akaprek ahon ason ingthang te. Honki apeh ke kangsam ahut so-arlo pen so-pinso ta en. Non ke honki ke en abang jum hek lo athe kelong sung krung, synthetic ahon ke-en chinghung munak lapen ador ta so dak.
Karbi atum along ta ahut pen Muga ahon pen kethak apekok theklong ta hai. Muga a ingki KARBI Anglong along ta pangreng abang do. Ahon abang ser ason lapen masapso dai-lor ta do. Bonsita Muga apeh ke Guwahati adung Sualkuchi pu adim along ong nai lo. Northeast adang do an ke ladak pensi kepdor lo. Akaprek akhai atum ta huladak is a peh kepathak dam aphan dam-dam. Ahom a richo kedo ahut muga a peh chihung pik. Muga a ingki ke Assam a longle rong si pangreng un chot tangho. Lasi muga ke Assam angthek ason cheplang det lo. Assamese atum a kachepangri ahut simsap kipi along muga a peh epak ke dovek nangji.
Sok pen Phelo keplang Atomo
Sok lapen Phelo banghini ta sining angsong kedo Songsar Richo a sopi lo. Sining angsong pen arnam atum ke pirthe nang chechar et lasi arnisi ke Sok abang apo aphan pulo “ne pirthe sunji, pirthe athak ke karbi-karbak atum ke bap-bi angkor, chosot hai hui si kecho lasi ne pirthe sun-si ne karbi atum aphan lana dam po.” Phelo bang ta arju dun long lok amat pulo “neta ne te alang pirthe sun dunji athe apok ingkrang chot ke chok che, areng-ahu ta do nangji lasi kachingthang a peh-ri ke ne pi dam po.” pusi banghini ta charjulo. Songsar Richo bang kroi si pulo “toh tangte banghini ta pirthe sun noi sita arni-apor chok lo te sining nang charlu nangji.” Lason si sok pen Phelo ke pirthe along nang keplang lo.
Serdihun Atomo
Serdihun Timungpi (Phangchopi) henlo karbi angbong therang kethak along amang kitur dun cheng abang. Hako ahut karbi atum apeh ari chingthang plop ahan ke do bonsita alir-alon kedo a peh-ari ke ave det.
Lasi arnam-arni atum si apun achak Serdihun aphan pilo. Serdihun Alun ateng pen ke Serdihun abang arta bihek angko Penta therang thak the pik pu. Amang kitur cheng ke wamkok along si kitur. Laso amang theklong amat so pinso atumta Serdihun aphan pulo “netum aphanta alir-abolon kedo a peh nang thak pi tha.” Lasi Serdihun abang poho along poho amang tur pi lo. Aphi an ke Pini lapen pekok ta thak pon lo. Pini along amang kitur pon chen ke aphidop lo lapen pekok ke peh jang-et henlo. Serdihun Alun along ke Serdihun bihek ako pen the o an a jir akaprek-kaprek do o. Pangrum pet pen ke jir thongkep bak doji. Jjir alun ke lapu henlo [(Honlam) Hoidoi].
Ove mati Serdihun Hoidoi, Dihun ke Honlam si nangtoi. Thu dampet Punja a longmoi,Dengmet vangroi ke Bengvoi a rongroi. Lunse ne som phalom voi-voi, Honlam ne kesoi pi thek doi. Soi det pen ne bi patu pi joi.
Peh-ri Amang lapen Chomangkan ahut peh amang alun kelun
Chomangkan ahut sok pun arhet sit muit aso ason selam thek longji. Laso aphan si peh-ri ta pa chingthang ji.Karjong abang chom arong pa le lo te chom asor nang inghong prong ji laso ahut chom asor atum arju po ko pi-pi si pirthe pen kachevan ma pu lo te thak dun ahut Amar kedo a pelu si kelo dun pu lo te pelu amar alun lun nang po. Pelu amar ke ingki akeng, kako akeng hai-hui henlo.
Peh-ri a men
Peh- peh aphan lo. Kekok- keko aphan lo. Pekok-kachekok apeh. Seleng- Akelok a peh along amang kitur pon ta do. So Arlo atum Adam Asar ahut aphu kachikur ki e a peh. Non ke akaprek alir pen abolon apeh aphan ta seleng si hok det lo.
Akithi a seleng aphan ke seleng apekok pusi kipu lapen akiding abang aphan ke seleng kiding pu si kipu. Akithi abang ke kachekok lapen akiding abang ke kachephangvar aphan si ke-en.
Pini- So-arlo atum aber anat kachingthang a pindeng. Pini ke vamkok pen si amoi along kok rap het ti-ti. Wamkok kok het lo pulo te Pini abang k jok je lo. Amoi pe akeng sarti an le dip nangji pini k. Pini kamplak pu t pu.
Hako ahut ke Pini alir kipi aphan sibu si kejok. Ajahak ke a Pini thak tang et si kejok lapen ajahak pe ahon si kejok. Aphi ke alir kedo a hon hithi along nang le o lo.
Wamkok- wamkok ke pini kamplak pen si chingthang rappet. Wam- ke awam aphan lapek kok-ke kekok aphan. Wamkok ta akaprek-kapek do o lapen non malom k abu ta ajat-jat do o.
Poho- so-pinso atum a pindeng
Poho ke sarmar lapen risomar ta en meh. A ke-er ke sarmar aphan lapen a kelok ke risomar aphan.
So Arlo atum a penan aphan poho thak pi po pi-pi.
Poho amang ke a havar tin ta amang akaprek-kapek do pik bon sita non ke chedam-chevang chelenge plot amat la an ke prek ke thek long le lo.
Hem along kapcho pha a bang Phu ahan ta poho arvak si maan-peng pi po. A ke-er pen akelok ke so-pinso atum si en longchot lasi so-arlo aphan kar vak me a poho ta do nangji pusi peh sarpi a poho abang thak lo. Object 46889.
Pinso a poho, object 46877, 46879-46881, 46884-46888.
Choi- So-pinso atum ka chingchoi a pindeng. Maan-peng ateng si alir kaprek. Object 46891-46895 lang ik non.
Amang
Do an amang ta ke en meh si keong bonsita phongrong angsu abang kithi-kejang ahut Alun lun le pu lote pi dun kartang pu si chethan hur. Hako ahut inut a nimsopi abang phongrong athe song lut amat si chelang lo ko pi si kedong ma pu amat si alang abang a therang along amang phongrong athe ason si tur pon det amat Phongrong-angsu pu ir kok.
Phongrong-angsu kedo apeh ke kachepangri atum ta Adam Asar ahut ke en eh si ke ong.
Phongrong-angsu angsu kedo a object: 46853, 46877, 46879, 46881, 46887.
Karbi a therang along kitur amang ke hini asanchom ason thak un. Isi ke varmon along kedo marat api, thengpi, mir , plipli hai-hui la ke pekok, seleng,poho apeh along si tur pon theklongji lapen non isi abang ke kethek long ahormu aphar akaprek, la ke long-aling, ingki akeng, kaki akeng hai-hui. Lason amang ke pini, pelu,piba,jir-ik a peh along is kitur thek longji. Labangso a mang ke chomangkan along kechar he along ta kilun pon do.
Kirip ke choi lapen jarong along amang kehom ajat lo. Vo- amek ke kirip pen kehom kachihung nai amang lo.
Ajahak amang amen k adim pen adim ke prek jam.
Hako ahut he a havar tin ta amang akaprek-kapek do. Lason si peh abang nat pensi kevang ma pu ta pang thek un bonsita Karbi Riso Nimso Rong-aje 1972 aningkan pen chenglok pu pen ke Karbi Anglong a havar do an ta chetong pen theklong po amang kethak chelar lap lo. Kaprek-kaprek ahavar long isivet amang ta amen prek jam ta thek. Karbi Anglong along rot ahem amang aphan ke West Karbi Anglong along ke Thengpi along vo jon ni kapardon pusi kipi.