English version of this page

Eksport, import og tilbakeføring av kulturminne

Kulturhistorisk museum er nasjonal vedtaksinstitusjon for eksport, og sakkyndig i saker som handlar om ulovleg import av arkeologiske og etnografiske gjenstandar.

Eksport

Kulturminnelova regulerer utførsel av kulturgjenstandar frå Noreg. Målet er å verne vår kulturarv og historie ved å hindre at viktige kulturminne blir ført ut av landet ulovleg, og ved å sikre god dokumentasjon på gjenstandane som blir eksportert på lovleg vis. 

Ein må søkje om eksportløyve for arkeologiske gjenstandar, inkludert myntar eldre enn 1537, og for etnografiske gjenstandar eldre enn 1900. Det er i tillegg utarbeidd ei oversikt over enkelte nyare myntar, medaljar, pengesetlar og ordenar av nasjonal verdi som ein må særskild søkje om (jf. eigen liste i forskrift til Kulturminnelova).

Vis bildeoversikt Lukk

Import

Dersom ein ynskjer å ta med ein kulturgjenstand inn i landet må ein ha eit gyldig eksportsertifikat dersom utførselslandet krev det. Målet er å hindre ulovleg omsetnad av kulturgjenstandar. Handelen med ulovlege kulturminne har blitt eit omfattande problem globalt. Noreg er forplikta av internasjonalt avtaleverk til å bidra til å avgrense slik handel og bevegelse av ulovlege kulturgjenstandar.

Ved mistanke om ulovleg handel, utførsle, innførsel eller eigarskap har museet varslingsplikt til rette myndigheit. Dette kan vere tollvesenet, Økokrim, politidistrikta, fylka eller relevant vedtaksmuseum. Kulturdepartementet er regeleiar på saksfeltet.

UNESCO har laga ei oversikt som regulerer kva som er lovleg og ulovleg å ta med ut av respektive land rundt omkring i verda. Dersom ein planlegg å kjøpe kulturgjenstandar i utlandet har ein plikt til å setje seg inn i utførselslandets lovverk på området før gjenstandane blir frakta ut.

Donasjonar og gåver

Museet får tidvis tilbod om gåver og donasjonar. Om slike skal aksepterast må det kunne dokumenterast eit gyldig eigarskap som stadfestar at gjenstandane ikkje er ulovleg erverva i opphavslandet, eller er ulovleg utførd herifrå eller frå eit mellomliggjande land. Gjenstandanes eigarhistorikk frå oppdagningstidspunkt må vera klarlagd og dokumentert. 

Museet kan fungera som eit mellombels depot for gjenstandar utan eigarhistorikk, eller som mistenkjast å vera ulovleg innførd til Noreg dersom Kulturdepartementet, politi eller tollvesen ber om det.    

Identifikasjon og verdsetting

Museet utfører ikkje identifikasjon av gjenstandar utan dokumentert eigarhistorikk. Verdsetting og vurdering av ekteheit for gjenstandar i privat eige utførast ikkje ved museet.

Verde kan vurderast etter offisiell oppfordring frå andre museum eller kompetent juridisk, statleg eller annan ansvarleg offentleg myndigheit.

Tilbakeføring av kulturgjenstandar

Dersom eit opphavsland eller ein folkegruppe søkjer om å få tilbakeført ein gjenstand som beviseleg er blitt eksportert eller på annan måte overført i strid med prinsippa i internasjonale og nasjonale konvensjonar, og det kan dokumenterast at gjenstanden er del av landets eller ei folkegruppes kulturarv, kan museet medverke til dette og bidra til samarbeid om tilbakeføring.

Søknadsskjema for utførsel:

Kontakt

Les meir

Publisert 13. nov. 2012 18:24 - Sist endra 24. sep. 2025 14:18
Del på e-post